Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka rrëzuar kërkesën e ish-presidentit Ilir Meta për zëvendësimin e masës “arrest në burg” me masa të tjera lehtësuese.
Vendimi u mor nga gjyqtari Erjon Çela më 13 gusht, i cili miratoi kërkesën e prokurorit të SPAK, Arben Kraja për lënien në qeli të kryetarit të Partisë së Lirisë.
Seanca fillimisht ishte caktuar për 8 gusht, por u shty pasi gjyqtari Erjon Bani shpalli moskompetencën. Rasti u kalua në duart e gjyqtarit Erjon Çela, i cili e shqyrtoi më 13 gusht.
Kërkesa për ndryshimin e masës u paraqit nga avokatët e Metës të mërkurën, pasi SPAK ka përfunduar hetimet dhe i ka komunikuar akuzat.
Avokatët e Ilir Metës braktisën seancën gjyqësore, duke pretenduar se vendimi i gjyqtarit Çela ishte i paracaktuar. Ky reagim erdhi pasi u bë e qartë se gjykata nuk do të pranonte kërkesën për lehtësim të masës së sigurisë.
Gjykata, e përbërë nga gjyqtari Erjon Çela, bazuar në nenet 112 dhe 260/2 të Kodit të Procedurës Penale, vendosi rrëzimin e kërkesës së ish-presidentit.
Prokurori i SPAK, Arben Kraja, kishte kundërshtuar kërkesën e mbrojtjes, duke argumentuar se masa aktuale e sigurisë është e nevojshme për ecurinë e procesit.
Avokati Kujtim Cakrani ka deklaruar se është dërguar në Gjykatën Kushtetuese kërkesa për shqyrtimin e masës së sigurisë dhe se brenda tetorit do të ketë një vendimarrje. Po ashtu, sipas tij po përgatitet dokumentacioni për në gjykatën e Strasburgut.
Ilir Meta ndodhet në burg që prej 21 tetor të vitit të kaluar. Ai akuzohet për vepra penale si “Korrupsioni pasiv i personave që ushtrojnë funksione publike”, “Falsifikim i vulave, stampave ose formularëve” dhe “Pastrim i produkteve të veprës penale”.
Më herët, Gjykata e Posaçme e Apelit për Korrupsionin dhe Krimin e Organizuar ka lënë në fuqi masën e sigurisë “arrest me burg” për Metën.
Në një seancë që zgjati 5 orë, gjykata e posaçme konfirmoi masën e arrestit në burg për Ilir Metën, ndërsa ai sulmoi ashpër drejtësinë.
Meta do të qëndrojë në një nga qelitë e paraburgimit tek ‘313’ në Tiranë, në pritje të vijimit të procesit gjyqësor për akuzat e ngritura ndaj tij nga SPAK.
Gazetare në “Rrjetin e Raportimit të Krimit të Organizuar dhe Korrupsionit në Shqipëri”- RRKOKSH.
Studente në fakultetin e historisë dhe filologjisë, Universiteti i Tiranës.
