Qeveria shqiptare ka vendosur këtë të premte, më 9 maj të falë gjobat dhe masat administrative të vendosura ndaj qytetarëve, gjatë këtyre 10 viteve të fundit. Mbledhja e Këshillit të Ministrave miratoi vendimin dy ditë para datës finale të zgjedhjeve parlamentare, ndërkohë që do të shfuqizohen të gjitha masat administrative të regjistruara nga data 1 janar 2015 e deri më 30 nëntor 2024.
Sipas vendimit, institucionet e ngarkuara me këtë detyrë janë Inspektoriati i Mbrojtjes së Territorit, Autoriteti Kombëtar i Ushqimit, Inspektoriati Shtetëror Shëndetësor, Drejtoria e Përgjithshme e Policisë së Shtetit, Policia Bashkiake dhe njësitë e vetëqeverisjes vendore. Këto institucione kanë kohë deri në 30 ditë nga hyrja në fuqi të vendimit, për të përgatitur listat e masave të shfuqizuara.
Më pas, sipas vendimit të miratuar, këto të fundit duhet të shkojnë në organin tatimor lokal që të hiqen nga regjistrat. Në rast se nuk hiqen nga sistemi, individët ose subjektet mund të paraqesin kërkesë për korrigjim. Nëse përsëri kjo kërkesë refuzohet, subjekti ka të drejtë ta ankimojë në gjykatë.
“Struktura përgjegjëse verifikon pretendimet në kërkesë dhe, nëse plotësohen kriteret e parashikuara në ligjin nr.127/2024e në këtë vendim, procedon sipas pikave 3 dhe 4, të këtij vendimi. Në rast se nuk plotësohen kriteret për shfuqizimin e masës, sipas ligjit dhe këtij vendimi, struktura përgjegjëse njofton brenda 5 (pesë) ditëve individin dhe/ose personin fizik apo juridik për refuzimin e kërkesës për heqje/fshirje nga sistemi, duke parashtruar edhe arsyet përkatëse. Kundër vendimit për refuzimin e heqjes/fshirjes së masës administrative subjekti ka të drejtën e ankimit në gjykatë”, thuhet më tej.
Kush përfiton e kush jo
Nga ky vendim mund të përfitojnë individë të cilët, kanë ndërtuar subjekte pa leje, për qëllime banimi ose qëllime bujqësore apo blegtorale në zona rurale. Po ashtu, edhe ata që kanë zhvilluar aktivitete bujqësore apo blegtorale pa leje në zona rurale, dhe ata individë të cilët kanë shkelur rregullat gjatë kohës së pandemisë së Covid-19.
Nga ana tjetër, jo të gjitha gjobat dhe masat administrative do të falen. Vendimi i Këshillit të Ministrave ka kërkuar që këto gjoba të hiqen nga sistemi, duhet të plotësojnë disa kritere.
Në vijim të miratimit, procedurat që i janë kërkuar Inspektoriatit të Kontrollit të Mbrojtjes së Territorit dhe të institucioneve të tjera janë që duhet të verifikojnë dokumentacionin e individit, i cili kërkon t’i falet gjoba e ndërtimit apo aktivitetit pa leje. Kjo bëhet për të siguruar që tipologjia e ndërtimit të përputhet me kriteret për shfuqizimin.
Në rast se ky dokumentacion provues mungon, sipas vendimit, kërkohet një akt ekspertimi nga tre ekspertë të licensuar ose një komision i posaçëm. Këshilli i Ministrave i ka vendosur dhe organeve të tjera si Autoriteti Kombëtar i Ushqimit dhe Inspektorati Shëndetësor, të njëjtat ndjekje procedure të ngjashme me IKMT-në për përgatitjen e listave dhe miratimin e tyre.
Sa i përket përballjes buxhetore, VKM-ja thotë se përballohet nga secili institucion të përmendur pak më sipër.
“Shpenzimet administrative për realizimin e procesit të heqjes/fshirjes së masave administrative të paekzekutuara dhe të shfuqizuara me ligjin nr.127/2024, të kryera sipas këtij vendimi, përballohen nga secili institucion”, thuhet në pikën e fundit të vendimit të Këshillit të Ministrave.
Kjo nuk është hera e parë që propozohet falja e gjobave. Në dhjetor të vitit të kaluar, kjo temë ka ngjallur debat në Kuvend, pas propozimit nga 35 anëtarë të grupit parlamentar i Partisë Socialiste. Nga ana tjetër, Partia Demokratike nuk ka rënë dakord me këtë projektligj të socialistëve.
Disa ditë më vonë, ishte po prapë Partia Demokratike e cila e pranoi si projektligj, me kusht që zgjeroheshin më shumë kategoritë përfituese. Sipas atyre, u kërkuar zgjerimi për një lehtësim në barrën ekonomike për qytetarët dhe bizneset e gjobuara.
Gazetare me përvojë në raportimin e kronikës së zezë dhe çështjeve politike në Shqipëri.
Gjithashtu, ajo ka qenë pjesë e “Investigative Journalism Lab” pranë “Albanian Center for Quality Journalism” (ACQJ).
Në SHBA ka marrë leksione të gazetarisë investigative në Kolegjin e Bostonit.
Desada ka përfunduar studimet në “Media Leadership and Management” dhe “Political Journalism” dhe ka qenë e angazhuar në projekte dhe internship-e që fokusohen në gazetarinë cilësore dhe hetimore.
Praktikante-gazetare në “Rrjetin e Raportimit të Krimit të Organizuar dhe Korrupsionit në Shqipëri”- RRKOKSH.
Studente në fakultetin e historisë dhe filologjisë, Universiteti i Tiranës.
