Prokuroria e Posaçme kundër Korrupsionit dhe Krimit të Organizuar (SPAK) ka kërkuar dënime alternative, përmes shërbimit të provës, për tre persona të pandehur në dosjen hetimore që lidhet me ish-presidentin Ilir Meta dhe ish-bashkëshorten e tij, Monika Kryemadhi.
Në përfundim të shqyrtimit gjyqësor ndaj Fatime Kryemadhit, Pirro Xhixhos dhe Ema Çokus, SPAK kërkoi shpalljen e tyre fajtorë për akuzat përkatëse, por propozoi që dënimet me burg të mos ekzekutohen, duke u zëvendësuar me masa alternative. Prokuroria kërkoi gjithashtu konfiskimin e një pasurie të Fatime Kryemadhit, e cila, sipas saj, ka vlerë ekuivalente me shumën që dyshohet se është pastruar.
Fatime Kryemadhi, nëna e Monika Kryemadhit dhe ish-vjehrra e Ilir Metës, akuzohet nga SPAK për pastrim parash në kuadër të një skeme financiare që, sipas prokurorisë, lidhet me pasuritë e çiftit Meta-Kryemadhi.
Prokurori i Posaçëm, Sotir Kllapi, kërkoi që gjykata ta dënojë Kryemadhin me 7 vite e 6 muaj burg. Për shkak të aplikimit të gjykimit të shkurtuar, dënimi reduktohet në 5 vite burg. Megjithatë, SPAK kërkoi që, duke marrë në konsideratë moshën e të pandehurës dhe rrethanat e çështjes, ky dënim të konvertohet në 5 vite shërbim prove.
Sipas akuzës, Fatime Kryemadhi ka ndihmuar në justifikimin dhe kalimin në sistemin financiar të shumave të parave që SPAK i konsideron me burim të pajustifikuar. Hetimet e prokurorisë pretendojnë se një pjesë e skemës lidhet me marrjen e dy kredive për blerjen e apartamenteve, të cilat më pas janë shlyer përmes pagesave cash.
SPAK deklaroi se, përmes veprimeve të atribuuara Kryemadhit, janë futur në sistemin bankar rreth 846 mijë euro me burim të pajustifikuar. Prokuroria argumenton se këto veprime nuk kanë pasur si qëllim përfitimin personal të saj, por kanë shërbyer në favor të vajzës së saj, Monika Kryemadhit, dhe ish-bashkëshortit të saj, Ilir Meta.
Një nga kërkesat kryesore të SPAK është konfiskimi i vilës trekatëshe të Fatime Kryemadhit në zonën rezidenciale “Kodra e Diellit”.
Sipas prokurorisë, edhe pse pasuria rezulton e regjistruar si e krijuar përmes burimeve të ligjshme, ajo përfaqëson një vlerë ekuivalente me shumën që dyshohet se është pastruar. Për këtë arsye, SPAK kërkoi që vila të konfiskohet si pasuri zëvendësuese.
Në të njëjtën dosje, SPAK kërkoi shpalljen fajtor të Pirro Xhixhos, ish-kreut të Autoritetit të Komunikimeve Elektronike dhe Postare (AKEP), për korrupsion pasiv.
Prokuroria kërkoi dënimin e tij me 4 vite e 6 muaj burg, i cili, pas gjykimit të shkurtuar, reduktohet në 3 vite. Edhe për Xhixhon, SPAK kërkoi pezullimin e ekzekutimit të dënimit dhe vendosjen në shërbim prove për 4 vite, duke marrë në konsideratë moshën e tij dhe faktin se, sipas prokurorisë, nuk rezulton të ketë përfituar drejtpërdrejt për vete.
Sipas SPAK, Xhixho, gjatë kohës që drejtonte AKEP-in, ka ndikuar te drejtues të një kompanie celulare për një marrëveshje interkoneksioni që, sipas akuzës, favorizonte interesa të lidhura me ish-çiftin Meta-Kryemadhi.
Prokuroria pretendon se veprimet e Xhixhos kanë krijuar kushtet për përfitime financiare nga biznesmeni Adrian Shatku dhe se këto të ardhura lidhen me skemën e hetuar nga SPAK.
Për Ema Çokun, të cilën SPAK e përshkruan si person me lidhje të afërta me Monika Kryemadhin, prokuroria kërkoi dënimin me 7 vite burg për pastrim parash.
Me aplikimin e gjykimit të shkurtuar, dënimi reduktohet në 4 vite e 8 muaj burg. Edhe në këtë rast, SPAK kërkoi pezullimin e ekzekutimit të dënimit dhe vendosjen në shërbim prove për 5 vite.
Sipas akuzës, Çoku ka firmosur një deklaratë noteriale për një hua prej 220 mijë eurosh, e cila është përdorur, sipas prokurorisë, për të justifikuar burimin e disa fondeve të lidhura me Fatime Kryemadhin.
Çështja ndaj Fatime Kryemadhit, Pirro Xhixhos dhe Ema Çokut është pjesë e hetimeve të SPAK që lidhen me ish-presidentin Ilir Meta dhe Monika Kryemadhin, por ata po gjykohen në procese të ndara.
Gjykata e Posaçme rrëzoi kërkesën e Fatime Kryemadhit për t’u tërhequr nga gjykimi i shkurtuar dhe për bashkimin e çështjes së saj me procesin ndaj Metës dhe Kryemadhit, të cilët po gjykohen me procedurë të zakonshme për akuza që përfshijnë korrupsion, pastrim parash dhe fshehje pasurie.
Lindita Çela është një gazetare investigative e shquar, e njohur për raportimet e saj të përpikta dhe të guximshme mbi krimin e organizuar dhe korrupsionin në Shqipëri. Me një karrierë që shtrihet për mbi dy dekada, Çela është konsoliduar si një figurë e rëndësishme në fushën e gazetarisë investigative, duke fituar vlerësime si në nivel kombëtar ashtu edhe ndërkombëtar për punën e saj.
